Радиологија

КТ може да му помогне на Вашиот доктор да ја открие причината за Вашиот проблем а со тоа и навремено да Ви биде понуден најдобриот третман за Вас. Компјутерската томографија се користи за дијагностицирање на :

• скршеници на коските
• повреди на внатрешните органи
• проблеми со крвните садови
• дијагностицирање на рак и туморозни промени

Како и кај рентгенот, КТ скеновите користат зрачење. Нивото на зрачење е премногу мало и контролирано. Софистицираниот апарат за Компјутерска Томографија во Општата болница Еуроиталиа овозможува современо и безбедно снимање. Компјутерската томографија ( КТ ) не е препорачлива кај бремени жени. Доколку имате вградено пејсмејкер или некакви метални импланти ( вештачки колк, колено, импланти во пределот на окото, ортопедски плочки, шипки или штрафови ) за Вас Компијутерската Томографија како снимање е сосема безбедна метода.

Препорачливо е да облечете удобна облека која доколку е потребно за целите на снимањето ќе треба да ја соблечете. Доколку е неопходно, нашиот персонал ќе Ви достави специјална стерилна наметка за еднократна употреба само за потребите на снимањето. Метални декоративни предмети на вашето тело како што се:

• метални копчиња
• слушни помагала
• метални патенти
• накит, пирсови или украси за коса

не се дозволени во текот на снимањето. Доколку имате некакви нејаснотии и прашања во врска со истите Ве молиме контактирајте нe.

Компјутерската томографија е најдоброто решение за Вас. Зошто? Затоа што дигиталниот рентген нема да произведе детална снимка на исто ниво, па токму затоа снимките од Компјутерска Томографија во медицината се најсовремена метода за прецизно дијагностицирање на заболувањето.

Доколку се одлучите да го направите овој преглед ќе бидете замолени од персоналот на Приемниот пулт во Еуроиталиа општа болница да го пополните формуларот за Општа согласност. Со оваа изјава Вие се согласувате да го направите испитувањето и разбирате што сè е вклучено во истото.
Радиолошкиот техничар ( кој е дел од тимот на радиологија обучен технички да ги изведува снимањата ) по влегувањето во одделот за Радиодијагностика ќе побара од Вас да ги пополните дополнителните формулари за согласност и ќе Ве информира за текот и постапката на самиот преглед.

Пред да го направите компјутерското снимање ( КТ ) Ве молиме почитувајте ги следните инструкции:

• пред снимањето препорачливо е да бидете гладни или последниот оброк да биде 3 – 4 часа пред снимањето
• доколку треба да направите КТ снимање на абдомен задолжително е да бидете гладни! Нашиот совет е во текот на предходниот ден да бидете на потечна храна ( супа, чорба ) и да ја прескокнете вечерата.
• доколку земате некакви лекови – терапија, Ве молиме продолжете да ги земате како вообичаено, освен ако Вашиот доктор не Ве советувал поинаку.
• Доколку имате било каква грижа или прашање во врска со земањето на препишаната терапија – слободно контактирајте не! Нашите доктори стојат на Ваше располагање!
• доколку пак, сте бремена веднаш известете го докторот. Компјутерската Томографија не е препорачлива во текот на бременоста!

По индикација на доктор специјалист по Радиологија доколку е потребно во текот на снимањето можно е да се употреби контрастно средство за подобар увид во одредени ткива и крвни садови. Контрастниот материјал, се инјектира автоматски по интра-венски пат преку специјализиран апарат кој го ракува дроктор радиолог од техничката соба додека Вие мирно лежите – позиционирани на КТ апаратот. Пред аплицирањето на контрастен материјал нашите доктори специјалисти по Радиологија и радиолошките техничари ќе Ве запрашаат дали сте алергични на одредени лекарства. Исто така детално информирајте го докторот доколку имате хронични заболувања како на пример: шеќерна болест, астма, кардиоваскуларни заболувања, или болести поврзани со функцијата на бубрезите. Пациентите со хронични заболувања можно е да имаат повисок ризик за појава на некаква реакција од контрастниот материјал, како и негова побавна елиминација ( исфрлање ) од организамот.

КТ е голема машина со кружна форма која има вдлабнатина во средината.
Пациентот се поставува во лежечка положба на кревет кој може да се ротира горе или долу и да се движи кон центарот на внатрешноста на кружниот дел. Во машината е вградена рентгенска цевка која ротира околу телото на пациентот и произведува слики од различни агли на телото. Во текот на целото снимање ќе биде потребно да мирувате. За да се задржи правилната положба на телото дополнително во текот на снимањето доколку има потреба ќе бидат употребени стегачи или специјални перничиња. Откако ќе бидете правилно позиционирани од страна на радиолошкиот техничар, тој/таа ќе ја напушти просторијата и заедно со доктор специјалист по Радиологија од помошната техничка просторија преку прозорецот ќе го следат целокупното снимање.
Во текот на целото снимање ќе бидете во можност преку интерфон да комуницирате со докторот специјалист по радиологија и со радиолошкиот техничар.
За било каков сомнеж или прашање, слободно консултирајте се со нашиот тим пред самото снимање. Тимот на Еуроиталиа Ви стои на располагање!

Времетраењето на прегледот заклучно со читањето на наодите ( поточно од прием на пациент, па подготовка на пациент, снимање и читање резултати ) трае од 60 до 90 минути, зависно од тоа кој дел од Вашето тело ќе се снима и каква е општата здравствена состојба на пациентот.

Компјутерската томографија е безболна, неинвазивна метода. Најтешкиот дел е да останете мирни. Обидете се да се опуштите колку што е можно повеќе.

Во повеќето случаи, веднаш штом скенирањето е завршено, можете да си одите дома или пак да се вратите на болничкиот оддел каде што престојувате.

Доколку Ви било аплицирано контрасно средство ќе побараме од Вас да почекате 10 до 30 минути пред да го напуштите одделот. По препорака на докторот можеби ќе треба да конзумирате вода или други течности за време на оваа кратка пауза. Паузата од 10 до 30 минути на одделот е препорака со цел да се осигураме дека сте добро и дека нема настанато некаква алергиска реакција. По завршувањето на целокупниот преглед можете да продолжите со Вашите вообичаени активности.

По завршувањето на снимањето доктор специјалист по Радиологија ќе ги разгледа смниките и врз основа на нив ќе изготви медицински извештај ( резултат ) со појаснување за состојбата и понатамошни препораки или соодветно лекување за во иднина. Резултатот го добивате во текот на истиот ден кога е извршено снимањето, или доколку се работи за комплексен случај најдоцна до 1 ден по снимањето.

Магнетната резонанца може да Ви помогне да откриете што е причината за Вашиот проблем и да му помогне на Вашиот доктор да го одбере вистинскиот третман за Вас. Магнетната резонанца произведува детална слика од Вашето тело и се употребува за снимање на речиси сите делови од телото:

• мозок и р’бетен столб
• коски и зглобови
• граден кош и дојки
• внатрешни органи како што се црн дроб, матка, простата и сл.

Магнетната резонанца дава многу јасни и прецизни слики на мекоткивните структури околу коските, но и на промените на структурата на коските. Преку Магнетната резонанца може порано да биде откриено и дијагностицирано заболувањето, а со тоа поуспешно ќе биде и лекувањето.

Магнетната резонанца е многу безбедна и безболна процедура.
Магнетната резонанца не е препорачлива кај пациентите кои имаат вградено пејсмејкер или метални импланти кои не се изградени од титаниумски материјал.
Повеќе за оваа тематика ќе прочитате подолу во истиов информативен текст. Доколку пациентот е во рана бременост, пред се, во првите 3 месеци од бременоста не е препорачливо да се извршува магнетно снимање и задолжително консултирајте се со Вашиот доктор!
За било каков сомнеж или прашање пред самото снимање слободно консултирајте се со радидијагностичкиот тим на Еуроиталиа!

Доколку имате вградено метални импланти не секогаш значи дека нема да може да се изврши магнетното снимање!
Се зависи од видот на материјалот од кој се изработени. Доколку станува збор за титаниумски материјал на безбеден начин може да се изведе снимањето. Од исклучителна важност е да го известите нашиот тим по радиологија доколку поседувате вакви метални фрагменти и импланти.
Под метални фрагменти и импланти подразбираме:

• Пејсмејкер
• Стент
• Слушни апарати
• Вештачки импланти во пределот на окото
• Ортопедски Вештачки зглобови ( вештачки колк, вештачко колено )
• Хируршки спојки
• Ортопедски плочки, шипки или штрафови

Некои бои кои се користат при тетовирањето може да содржат траги од метал. Со самото тоа во текот на снимањето може да почувствувате пецкање во пределот на тетоважата. Веднаш известете го радиологот доколку почувствувате некаква нелагодност во текот на снимањето!

Препорачливо е да облечете удобна облека која доколку е потребно ќе треба да ја соблечете. Нашиот персонал ќе Ви достави специјална стерилна наметка за еднократна употреба само за потребите на снимањето. Метални декоративни предмети на Вашето тело како што се :

• часовници
• обетки, ланчиња
• украси во коса
• облека која соджи метални патенти и копчиња

не се дозволени во текот на снимањето. Истите мора да ги отстраните пред да се снимате бидејќи може негативно да влијаат врз магнетот.

Доколку не можете да направите МР, или доколу сте спречени бидејќи имате вградено пејсмејкер или метални импланти кои не се изградени од титаниумски материјал не грижете се, врвните специјалисти по радиологија во нашата болница Еуроиталиа, ќе Ви предложат друг алтернативен начин на снимање на пример: Компјутерска Томографија ( КТ ).

Доколку се одлучите да го направите овој преглед ќе бидете замолени од персоналот на Приемниот пулт во Еуроиталиа општа болница да го пополните формуларот за Општа согласност. Со оваа изјава Вие се согласувате да го направите испитувањето и разбирате што сè е вклучено во истото.
Радиолошкиот техничар/ка ( кој е дел од тимот на радиологија обучен технички да изведува снимањата ) по влегувањето во одделот за Радиодијагностика ќе побара од Вас да ги пополните дополнителните формулари за согласност и ќе Ве информира за текот и постапката на самиот преглед.

Пред да го направите магнетното снимање ( МР ) Ве молиме да ги следите следните инструкции:

• можете слободно да јадете храна и да внесувате течности во умерена количина зависно од тоа за кој дел од телото ќе се изведува снимањето
• во одредени случаеви ќе бидете замолени да не внесувате храна и течности 4 часа пред снимањето,
• зависно од типот на снимањето може ќе Ви биде препорачано да внесувате поголема количина на течности
• доколку треба да направите МР снимање на абдомен препорачливо е да бидете гладни,
• вашата вообичаена терапија на лекарства – Ве молиме продолжете да ја земате како вообичаено, освен ако Вашиот доктор не Ве советувал поинаку,
• доколку сте бремена веднаш известете го нашиот тим од доктори. Магнетна Резонанца не е препорачлива во првите 3 месеци во текот на бременоста, а за останатите гестациски месеци задолжително консултирајте се со доктор!

По индикација на доктор специјалист по Радиологија доколку е потребно во текот на снимањето можно е да се употреби контрастно средство за подобар увид во одредени ткива и крвни садови. Контрастниот материјал, кој треба да се аплицира е во сосема мала количина и не предизвикува алергиски реакции.
Во исклучителни случаеви контрастното средство може да предизвика на пример црвенило и јадеж на кожата. Овие појави се со мал интензитет и не траат долго. Доколку имате одредени алергии навремено известете го нашиот радиолог. А, доколку почувствувате нелагодност по снимањето веднаш информирајте го нашиот тим. Во Еуроиталиа општа болница тимот во одделот по Радиодијагностика е тука за Вас за да Ви даде одговор на сите Ваши дополнителни прашања!

Апаратот за Магнетна Резонанца ( МР ) наликува на тунел.
Пациентот во текот на снимањето е поставен во лежечка положба на ротирачки кревет кој се движи кон внатрешноста на тунелот. За да се задржи правилната положба на телото дополнително пред почетокот на снимањето доколку има потреба ќе бидат употребени стегачи и перничиња. Радиолошкиот техничар ќе Ви помогне правилно да го позиционирате Вашето тело со сите неопходни помагала. Во текот на целокупното снимање од особена важност е пациентот да мирува.
Откако ќе бидете правилно позиционирани со помош на ротирачкиот кревет ќе бидете придвижени во внатрешноста на апаратот.
Радиолошкиот техничар ќе ја напушти просторијата и заедно со докторот специјалист по Радиологија од техничката просторија преку прозорецот ќе го следат целокупното снимање. Во текот на целото снимање ќе бидете во можност преку интерфон да комуницирате со докторот специјалист Радиолог и радиолошкиот техничар.
Магнетниот апарат во текот на снимањето произведува досаден звук кој прави малку бучава. Токму заради таа причина ќе Ви бидат дадени ушни тампони се со цел да се намали вревата.

Времетраењето на прегледот заклучно со читањето на наодите ( поточно од прием на пациент, па подготовка на пациент, снимање и читање резултати ) трае од 60 до 90 минути, зависно од тоа кој дел од Вашето тело ќе се снима и каква е општата здравствена состојба на пациентот.

Снимањето е сосема безболно.
Најтешкиот дел е да останете мирни. Осигурете се да Ви биде што е можно поудобно пред да се започне со снимањето и обидете се да се опуштите. Скенерот на МР е краток тунел, но сепак доколку сте клаустрофобични ( страв од затворен простор ) Ве молиме да не информирате! Пред да започне снимањето ќе Ви биде предаден специјален далечински управувач со копче за автоматско прекинување на снимањето. Доколку го притиснете ќе ја прекинете работата на машината ( МР ).
Во случај на паника имате право да реагирате со притискање на копчето, меѓутоа имајте на ум дека МР снимање не е препорачливо да се повторува повеќе пати, а и истото би Ве чинело многу повеќе доколку се повторува.

Согласно со потребите на пациентите кои треба да извршат МР снимање, а не се во состојба да останат мирни во текот на самото снимање, како и за деца – Еуроиталиа Општа болница нуди можност за апликација на краткотрајна анестезија. Анестезија која трае само додека трае процесот на снимањето. Истата се аплицира интра – венски од страна на доктор специјалист по Анестезија.

Во повеќето случаи, веднаш штом снимањето е завршено, можете да си одите дома или пак да се вратите на болничкиот оддел каде што престојувате.
Доколку Ви било аплицирано контрасно средство ќе побараме од Вас да почекате 10 минути пред да го напуштите одделот. Оваа препорака е за да се осигураме дека сте добро и дека нема настанато некаква алергиска реакција. По завршувањето на целокупниот преглед можете да продолжите со Вашите вообичаени активности.

По завршувањето на снимањето доктор специјалист по Радиологија ќе ги разгледа снимките и врз основа на нив ќе изготви медицински извештај ( резултат ) со појаснување за состојбата и понатамошни препораки или соодветно лекување за во иднина.
Резултатот го добивате во текот на истиот ден кога е извршено снимањето или најдоцна до 1 ден по снимањето.

Ехо на дојки се изведува преку ехосонографски апарат кој користи високо фреквентни ( ултразвук ) бранови кои овозможуваат да се погледне во внатрешноста на дојката. Прегледот се извршува со употреба на безбоен гел, неопходен за подобар контакт на малата рачна сонда со која нежно, безболно се притиска врз површината на дојката. Самиот преглед е безболен и безбеден за пациентот.

Со ехосонографскиот преглед на дојка може навремено да се детектираат настанатите промени во структурата на ткивото на дојката кои не се воочливи при физички преглед и промени за кои воопшто не сте свесни дека се случуваат. Ехосонографскиот преглед на дојка во Еуроиталиа општа болница го изведуваат врвни доктори специјалисти по Радилогија кој поседуваат долгогодишно искуство во оваа област.

Ехосонографијата на дојка е сосема безболна и безбедна метода. Досега не се познати ниту пак забележани штетни влијанија по здравјето на пациентите.

При подготовката за ехосонографскиот преглед на дојки нема одредени ограничувања во однос на внес на храна и пијалоци пред снимањето. На денот на закажаниот термин Ве советуваме да носите удобна облека, да не користите дезодоранс, пудра, лосион или парфем на градите бидејќи ќе Ви биде нанесен гел во пределот на градите и деловите под пазувите за време на прегледот. Некои дезодоранси, лосиони, пудри и парфеми можат да влијаат на неповолен начин за овој тип на преглед.

Ехосонографијата на дојка е првиот и основен чекор во превенција од заболувања на дојката. Постојат и други алтернативни методи за преглед на дојка како што е: Дигитална мамографија ( МГ ), Магнетна резонанца на дојка ( МР на дојка) и слично.

Доколку се одлучите да го направите овој преглед ќе бидете замолени од персоналот на Приемниот пулт во Еуроиталиа општа болница да го пополните формуларот за Општа согласност. Со оваа изјава Вие се согласувате да го направите испитувањето и разбирате што сè е вклучено во истото.

Времетраењето на прегледот е околу 20 до 30 минути.
Докторот специјалист по Радиологија ќе дискутира со Вас за Вашиот здравствен проблем со дојките. Ќе бидете замолени да ја соблечете облеката од половината нагоре. Прегледот се изведува во лежечка позиција. На вашите дојки ќе биде нанесен проѕирен гел кој ќе овозможи на ултразвучната сонда да се движи лесно врз кожата, површината на дојката и помага да се направат јасни слики. Докторот специјалист по Радиологија со нежни движења ќе ја поместува сондата по површината на дојката се со цел детално да може да се забележат сите промени настанати во истата.

Доколку страдате од општа преосетливост на дојките можно е да почувствувате благо чувство на непријатност ( благо притискање ) за време на прегледот додека сондата поминува преку дојката, но за поголемиот дел од жените ова е сосема безболно искуство!

Ултразвучните снимки ќе бидат разгледани од докторот специјалист по Радиологија и врз основа на нив докторот ќе изготви медицински извештај ( резултат ) со појаснување за состојбата и понатамошни препораки за соодветно лекување за во иднина.

По завршувањето на прегледот задолжително придржувајте се до препишаните препораки од Вашиот доктор! Доколку е се во ред и наодите се уредни можете веднаш да им се вратите на Вашите секојдневни обврски, вклучувајќи го и работното место или спортување.

По ехосонографскиот преглед не би требало да имате некакви несакани ефекти кои би Ве загрижиле. Сепак, доколку се појават одредени физички промени на телото задолжително контактирајте го Вашиот доктор!

По завршувањето на прегледот докторот специјалист по Радиологија ќе Ве советува кога да го закажете Вашиот следен контролен преглед. Ве молиме да се придржувате до советите препишани од истиот и да го известите Приемниот пулт доколку не сте во можност да дојдете на контролниот преглед!
Доколку имате некакви прашања или сте загрижени за некоја од препишаните препораки слободно контактирајте не! Еуроиталиа општа болница Ви стои на располагање!

Мамографијата претставува специјализирана рентгенска метода која се користи за преглед на дојки. Со помош на дигиталниот мамограф може да се забележат и најмалите детали и неправилности во ткивото на дојката. Еуроиталиа Општа болница располага со најсовремен дигитален мамограф Sennographe Cristal Mammo и специјализиран тим на стручни лица од оваа област!

Мамографијата овозможува навремено дијагностицирање на заболувањата на дојката. При мамографскиот преглед може да се детектираат промени кои при физичкиот преглед не се забележуваат. Самото тоа придонесува за рано откривање на заболувањето и можност за негово успешно лекување. Мамографијата како процедура се изведува по 40-та година, но доколку е потребно или постои некоја фамилијарна анамнеза за одредено заболување во консулатација со доктор – специјалист може да се изврши и порано.

Мамографијата е безбедна и безболна метода. Досега не се познати ниту пак забележани штетни влијанија. При самото снимање апаратот емитува многу мала доза на радиолошко зрачење кое не претставува никаков ризик за здравјето на пациентот. Доколку се одлучите да не го изведете снимањето поради нереален страв од радиолошко зрачење, имајте на ум дека доколку постојат промени во вашите дојки, ќе ја загубите шансата навремено да ги откриете и да ги третирате. Доколку сте бремена или во период на доење задолжетелно известете го Вашиот доктор! Мамографијата не е препорачлива во период на бременост!

На денот на закажаниот термин Ве советуваме да носите удобна облека која ќе треба да се соблече во текот на снимањето. Пред прегледот Ве молиме да не користите дезодоранс, пудра, лосион или парфем на градите и под пазувите. Некои дезодоранси, лосиони, пудри и парфеми можат да влијаат на неповолен начин за овој тип на преглед.

Доколку се одлучите да го направите овој преглед ќе бидете замолени од персоналот на Приемниот пулт да го пополните формуларот за Општа согласнот. Со оваа изјава Вие се согласувате да го направите прегледот и разбирате што се вклучува истиот.

Времетраењето на прегледот изнесува од 10 до 15 минути. Снимањето се изведува на тој начин што пациентката е во стоечка положба. Радиолошкиот техничар/ка ќе Ве замоли да се приближите до апаратот за да може да Ве позиционираат правилно. Градите се поставуваат на апаратот и нежно се притискаат со горниот дел од машината.
Обично се прават две снимки од секоја града посебно, но доколку вашите гради се поголеми неопходно ќе биде да се направат повеќе слики. Радиолошкиот техничар ќе Ве извести доколку има потреба за тоа.

Прегледот е безболен и безбеден по здравјето. Меѓутоа може да се почувствува одредена нелагодност и притисок, поради компресијата што се користи во самата процедура на снимањето.

Снимките ќе бидат разгледани од доктор специјалист по Радиологија и врз основа на нив ќе биде изготвен медицински извештај ( резултат ) со појаснување за состојбата како и препорака за понатамошно лекување доколку тоа е потребно.

По завршување на прегледот задолжително придржувајте се до пропишаните препораки од Вашиот доктор! Доколку е сè во ред и наодите се уредни веднаш може да се вратите на секојдневните обврски и на работното место.

По завршување на мамографскиот преглед не би требало да имате некакви несакани ефекти кои би Ве загрижиле. Доколку забележите одредени физички промени на Вашите гради или тело, Ве молиме веднаш консултирајте го Вашиот доктор!

По завршувањето на прегледот докторот специјалист по Радиологија ќе Ве советува кога да го закажете Вашиот следен контролен преглед.
Ве молиме да се придржувате до советите препишани од истиот и да го известите Приемниот пулт на Еуроиталиа општа болница доколку не сте во можност да дојдете на контролниот преглед!
Доколку имате некакви прашања или сте загрижени за некоја од препишаните препораки слободно контактирајте не! Тимот на општа болница Еуроиталиа Ви стои на комплетно располагање!

Под рентген снимање ( РТГ ) се подразбира преглед на одреден дел од телото со помош на рентген апаратура. Дигитален рентген е апарат кој емитува рентген зраци ( x – rays ) со чија помош се добива дигитална слика на внатрешните органи и коски во човековото тело – прикажана во дигитална форма на компијутерски уред.
Механизмот на добивање на рентген слика се должи на продорното дејство на рентген зраците како и способноста на човечкото ткиво истите да ги апсорбира. Секое ткиво има различна апсорпциона моќ која зависи од самата густина на ткивото. Тоа во најголема мера помага за разграничување на типот на ткивото на снимката. Со брзиот развој на технологијата оваа процедура е комплетно дигитализирана така што денеска се користи детекторски панел кој со огромна прецизност и висока резолуција богата со пиксели го прифаќа снопот кој минал низ телото и како таков го претвора во дигитален запис кој потоа може да се обработува на најразличен начин и да се складира на секаков вид медиум како на пример CD или DVD.

Снимањето со дигитален рентген e сосема безбедна и безболна процедура. Таа е првата наједноставна и најбрза постапка доколку постои основано сомневање за некое заболување или индикација за некаква повреда ( траума ).

Овој тип на снимање е сосема безопасен.
Дигиталниот рентген емитира рентгенско зрачење кое е сосема мало и контролирано. Но доколку сте, или мислите дека сте бремени или имате некое специфично заболување, тогаш задолжително известете го нашиот тим пред самата процедура!

На денот на закажаниот термин Ве советуваме да носите удобна облека.
Металните закопчувања како што се патентите, копчињата или пак накит- обетки, пирсови, прстени – ќе се појават и ќе попречат при скенирањето, така што ќе побараме од Вас да ги отстраните сите метални додатоци кои ги поседувате пред самото снимање!

Доколку се одлучите да го направите овој преглед ќе бидете замолени од персоналот на Приемниот пулт да го пополните формуларот за Општа согласнот. Со оваа изјава Вие се согласувате да го направите прегледот и разбирате што се вклучува истиот.

При подготовка за рентгенско снимање ( РТГ ) нема одредени ограничувања во однос на внес на храна и пијалоци пред снимањето.

Процедурата за рентген снимање започнува со подготовка на пациентот. Во општа болница Еуроиталиа – на пациентите најпрво им се објаснува целата процедура. Во зависност од тоа кој дел на телото се снима, неопходно е да се соблече гардеробата од тој дел на телото, и да се остранат сите метални додатоци кои би го попречиле снимањето ( накит, метални копчиња, ремени и слично ).
Следува позиционирање на пациентот врз апаратот, било да е тоа во седечка, стоечка, или лежечка позиција – во зависност од тоа кој дел од телото треба да се снима.
Самата експозиција трае само мал дел од секундата.
По снимањето, кај современите – дигиталните рентген апарати како што е и нашиот Brivio DRF во Еуроиталиа општа болница – тоа се врши со едноставно пренесување на сликата од мониторот до единицата за “суво развивање” и таквата процедура е многу поедноставна и трае еден миг.

Целата процедура ( прием, подготовка, снимање и резултат ) трае од 10 до 15 минути!

Снимањето е сосема безболно! Најтешкиот дел е да останете мирни. Обидете се да се опуштите колку што е можно повеќе. Доколку имате проблем да лежите мирно, тогаш посоветувајте се со радиолошкиот техничар. Тој/таа е тука за Вас да Ви помогне како да се позиционирате правилно на апаратот и како да останете мирни со цел да се остварат кристално чисти снимки.

Во повеќето случаи, веднаш штом снимањето е завршено, можете да си одите дома и да се вратите на Вашите секојдневни активности. Или пак, да се вратите во одделението, ако престојувате во болница. Тимот на Еуроиталиа општа болница – ќе Ве спроведе во текот на целиот процес на трансфер од еден оддел во друг.

Резултатите ги добивате експресно брзо во текот на истиот ден!
Дигиталниот рентген во општа болница Еуроиталиа е преглед кој не мора да го закажете. Слободно дојдете во нашата болница, пријавете се на Приемниот пулт и нашиот тим ќе Ве спроведе веднаш!